فلسفة الكايزن

واحدة من اسرار اليابان اللي ظلت مدفونة لسنين و اللي قدرت تحولها من دولة مهزومة و مدمرة الي الاقتصاد رقم ٢ في العالم في وقت قياسي هي فلسفة جديدة طورها واحد اسمه ماساكي إيماي و  اطلق عليها في كتاب كتبه اسم مفتاح نجاح اليابان التنافسي.

الفلسفة دي مش بس اعتمدت عليها اليابان في ثورتها الصناعية انما كمان ألهمت مجتمع الاعمال اللي شاف تويوتا بتزيح جنرال موتورز من على عرشها بفضل (الكايزن) و شاف شركات تانية زي فورد و بيكسار بتجني من وراها فوايد كتير. بالتالي ربما في فرصة كبيرة اننا نبقي احسن لو اتعلمنا مبادئها.

الكايزن كلمة يابانية معناها الحرفي هو (التغير الكويس) لكن معناها الحقيقي هو التحسن المستمر و تكوين ثقافة قوية حوالين المفهوم دا. فلسفة الكايزن بسيطة جدا => كل شئ يمكن تحسينه. طيب بتشتغل ازاي الكايزن ؟ تعالوا ناخد جولة نتعرف فيها علي مبادئ الكايزن العشرة :

١- متخليش العادات والتقاليد القديمة و الافتراضات المسبقة تمنعك من التحسين ، حتي لو كان في بيئة و ناس حواليك متعودين علي طرق معينة مريحة ليهم او شايفينها الافضل ، الكايزن بتقولك متخليش دا يمنعك من انك تفكر ازاي ممكن تقدم جديد يحسن الوضع الحالي.

٢- خليك مرن في أفكارك علي قد ما تقدر ، مثلا لو لقيت نفسك واخد رأي معين ، جرب كدا تدافع عن الرأي المخالف و تشوف هل برضه ممكن يبقي مقنع ؟ واحدة من درجات الذكاء هي قدرتك علي استيعاب آراء معاكسة لبعضها و انك تكمل من غير ما تتعصب لوجهة نظر ثابتة.

٣- كل المشاكل و الصعوبات اللي قدامك هي في حقيقتها فرص لو قدرت تفكر لها في حلول و تقدم قيمة مضافة سواء في تحسينها أو تستغلها بشكل شخصي  بحيث تتعلم منها و تطور نفسك و مهاراتك.

أهميتك حتيجي من قدرتك علي حل المشكلات و اصلاح الاشياء في بيئتك سواء كانت شركة او اسرة او مجتمعك و شطارتك و مهارتك هي ازاي تحول المشاكل لفرص تحول و نجاح.

٤- احتفاظك بالتفكير الايجابي مهم جدا في فلسفة الكايزن ، ببساطة دا اللي حيخليك تشوف الفرص و يساعدك تحفز نفسك عشان تعمل تغيير و ساعتها حيبقي عندك أمل و اراده تشوفه بيتحقق قدامك. دايما في حاجه ممكن تتعمل عشان تحسن الوضع ، لا تعجز !

٥- الايجابية مش معناها انك تتقبل الوضع الحالي و ترضي بيه خاصة لما تحس ان ليس في الامكان افضل مما كان ، علي العكس، المطلوب هو انك تستغل طاقتك الذهنية عشان تفكر بشكل ابداعي ازاي تعمل تغيير مش ازاي تلاقي عذر لعدم فعل شئ ، دا الفرق.

مش لاقي افكار؟ حاول تبص من منظور مختلف ، مثلا ازاي تخلي الحل الحالي - ابسط - اسرع - ارخص - معروض بشكل أفضل و هكذا ، دماغك حتشتغل لما تديها فرصة بمعني اصح. البارشوت مش حيطير غير لما تفتحه.

٦- الحكمة هي القدرة علي التفكير و التصرف اعتمادا علي الخبرات و المعلومات و المفاهيم اللي اتعلمتها. كل لما يبقي عندك قدرة علي التفكير بعمق في اللي حواليك كل ما حتتعلم و عشان كدا اكبر فرص لاكتساب الحكمة هي الازمات و المواقف الصعبة اللي حتقابلها في حياتك.

انت بتعمل قرارات سليمة بسبب خبراتك لكن عشان تكتسب الخبرة محتاج تعمل قرارات خاطئة و تتعلم منها. المصدر التاني للحكمة هي خبرات و تجارب اللي حواليك و عشان كدا ما تقفش عند شخص واحد او مصدر معين ، خليك منفتح علي الكل و بص من زوايا مختلفة ساعتها حتبقي قادر توصل أفضل للحقيقة.

٧- الابداع قبل المال ، التطوير اللي بتنادي بيه الكايزن لازم يبقي نابع من التحفيز الداخلي للعاملين و خلق بيئة حقيقية بتشجع عليه ، التغير المعتمد علي الفلوس فقط زي شراء تكنولوجيا متطورة او احضار خبراء في المجال صعب يساهم في تحول مستمر لو افتقد معاه الانضباط و التحمل و الاستمرارية.

٨- ابعد عن السعي لتحقيق الكمال من اول مره ، نفذ بأسرع ما يكون حتي لو حتحقق ٥٠٪ من هدفك ، فرصك في النجاح اكبر لو بدأت و هدفك تحقيق ٥٠٪ فقط و بعدها حاولت تتعلم من التجربة عن انك تستهدف تجقيق كل شئ من البداية باستخدام حل معقد.

ابدأ و ركز علي القياس و التعلم ، مستحيل تقدر تحقق تغير جوهري فقط بناء علي المعرفة النظرية ، محدش حيتعلم السباحة من غير ما ينزل المايه حتي لو قرأ ١٠٠ كتاب.

٩- لو عملت غلطة ، صححها علطول ، لازم تبقي متصالح مع ارتكاب الاخطاء و الفشل و متخافش منهم ، الفشل هو بداية لأي نجاح. اوعي تشوف الاخطاء بتكتر و بتكبر و تسيبها لحد ما يبقي صعب السيطرة و التحكم فيها. مهم ان يبقي عندك الشجاعه تعترف بالخطأ و تصلحه.

١٠- اختار التبسيط دايما في مقابل التعقيد ـ التغيير صعب و التغير في نظام معقد اصعب دا لو مش مستحيل. اختار ابسط الحلول اللي تقدر تنفذها بسرعة ، تغيير واحد ناجح حيشجع حصول تغييرات اكبر. بالشكل دا حتزود القدره علي استيعاب تغييرات اكبر. متشغلش بالك بالسرعه ، اشغل بالك بالاستمرارية.

دي كانت فكره سريعه عن فلسفة الكايزن ، اتمني تكون مفيدة ، لو عجبك محتوي التدوينة ، اعمل متابعة عشان يوصلك كل اللي بكتبه.

أظهر التعليقات